25-mart, juma kuni “Fuqarolar yig‘inlari raislari va ularning maslahatchilari saylovining tashkiliy-huquqiy asoslari” mavzusida video-muloqot shaklida seminar o‘tkazildi. Bu haqda tadbirni tashkil qilgan O‘zbekiston Respublikasi Oliy Majlisi Senati Kengashining Fuqarolar yig‘inlari raislari va ularning maslahatchilari saylovini tashkil etish hamda o‘tkazishga ko‘maklashuvchi komissiyasiga tayanib, O‘zA ma’lum qildi.
Unda Oliy Majlis Senati Kengashi Komissiyasi a’zolari, onlayn rejimida Qoraqalpog‘iston Respublikasi Jo‘qorg‘i Kengesi, viloyatlar va Toshkent shahri hokimliklari tashkiliy-nazorat guruhlarining rahbarlari, fuqarolar yig‘inlarida saylovni tashkil etish va o‘tkazishga ko‘maklashuvchi Qoraqalpog‘iston Respublikasi, viloyatlar hamda Toshkent shahri komissiyalari raislari va a’zolari, ushbu komissiyalar huzurida tashkil etilgan axborot xizmatlari rahbarlari, tuman va shahar komissiyalari, “Mahalla” fondining hududiy bo‘limlari raislari, shuningdek, ommaviy axborot vositalari vakillari ishtirok etdi.
Seminar chog‘ida ishtirokchilar saylovga tayyorgarlik ko‘rishning barcha bosqichlari to‘g‘risida to‘liq axborot va tushuntirish oldi. Oliy Majlis Senati Kengashi Komissiyasi a’zolarining chiqishlarida saylovning tashkiliy-huquqiy asoslariga alohida e’tibor qaratildi. Fuqarolar yig‘inlarida saylovni tashkil etish va o‘tkazishga ko‘maklashuvchi komissiyalar va ishchi guruhlar oldida turgan vazifalar ko‘rib chiqildi hamda amalga oshirilishi lozim bo‘lgan chora-tadbirlar belgilab olindi.
Seminarda fuqarolar yig‘inlari raislari va ularning maslahatchilari lavozimiga munosib nomzodlarni ko‘rsatish muhimligi aytildi. Mamlakat bo‘yicha 9764 nafar fuqarolar yig‘inlari raisini, shuningdek, ularning 99 mingdan ziyod maslahatchisi saylovini munosib darajada o‘tkazish uchun zarur shart-sharoitlar yaratishda mahalliy davlat hokimiyati organlari ko‘magining ahamiyati ta’kidlandi.
Senatorlar, Senat Kengashi Komissiyasi a’zolari seminar ishtirokchilarining ko‘plab savollariga javob berdi. Tadbirlar rejasiga muvofiq hududiy ko‘maklashuvchi komissiyalar hamda ishchi guruhlar a’zolari, ommaviy axborot vositalari hamda fuqarolik jamiyati institutlari vakillari ishtirokidagi bunday tadbirlarni barcha tuman va shaharlarda o‘tkazish rejalashtirilmoqda.
Izoh (0)