23 март куни Ўзбекистон Республикаси Олий ва ўрта махсус таълим вазирлигида олий таълим тизимидаги ҳамкорлик масалаларини ўзаро муҳокама қилиш учун Венгрия делегацияси билан учрашув ўтказилди. Бу ҳақда вазирлик матбуот хизмати хабар бермоқда.
Унда вазир ўринбосари Ласло Сабо бошчилигидаги Венгрия ташқи ишлар ва савдо вазирлигининг 6 нафар ходими, Ўзбекистон Республикаси Ташқи иқтисодий алоқалар, инвестициялар ва савдо вазирлиги, Олий ва ўрта махсус таълим вазирлиги вакиллари иштирок этди.
Мулоқот давомида Венгрия томони Ўзбекистон билан олий таълим соҳасидаги ҳамкорликнинг ривожланиши йўлида исталган соҳалар йўналишида 30 га яқин стипендиялар дастури ажратишга тайёр эканлигини билдирди. Ушбу дастурлар 3 йилга мўлжалланган бўлиб, бакалавриат, магистратура ва докторантура босқичидаги кадрларни тайёрлашни ўз ичига олади.
Таъкидлаш керакки, мазкур стипендияларда халқаро авиачипталардан ташқари барча тўловлар Венгрия томонидан қопланади. Ўзбекистонлик талабалар ушбу дастурлардан бири — БМТнинг озиқ-овқат ва қишлоқ хўжалиги бўйича ташкилоти — FAO (Food and agriculture organization of the United Nations)нинг стипендия лойиҳасида қатнашиши мумкин.
Учрашувда, шунингдек, Ўзбекистон ва Венгрия давлатлари олий таълим муассасалари ўртасида тўғридан-тўғри алоқаларни йўлга қўйиш ҳам муҳокама қилинди.
Изоҳ (0)