Литва пойтахти Вильнюс шаҳрида бокс бўйича 1998–1999 йилларда таваллуд топган ёшлар ўртасида анъанавий тарзда ўтказиб келинадиган халқаро турнир ўз ниҳоясига етди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Олимпиада ўйинларида ғолибликка эришган биринчи литвалик спортчи (1968 йил), уч карра Европа чемпиони (1965, 1967, 1969 йиллар) Дан Позняк хотирасига бағишланиб 11-бор ташкил қилинган мазкур мусобақада Литва, Ўзбекистон, Озарбайжон, Россия, Франция, Қозоғистон, Венгрия, Голландия, Греция, Италия, Польша, Чехия, Австрия, Тунис, Германия, Исроил, Грузия, Беларусь, Эстония, Украина ва Латвия ёшлар терма жамоалари ғолиблик учун баҳс юритди.
Мазкур мусобақа якунига кўра, Ўзбекистон ёшлар терма жамоаси аъзолари 3 та олтин ва 2 та бронза медалига сазовор бўлиб, умумжамоа ҳисобида биринчи ўринни эгаллади.
Ўзбекистон терма жамоаси ҳисобига олтин медалларни Шунқор Абдурасулов (-56 килограмм), Санжар Турсунов (-81 килограмм) ва Абдулла Худорганов (+91 килограмм) келтирган бўлса, Роримша Просфор (-91 килограмм) ҳамда Абу Нуранов (-64 килограмм) бронза медали совриндори бўлди.
Изоҳ (0)