Футбол бўйича Ўзбекистон миллий терма жамоаси бош мураббийи Самвел Бабаян Баҳрайнга қарши ЖЧ—2018 ва Осиё Кубоги—2019 саралаш учрашуви олдидан сариқ карточкалар масаласида фикр билдирди. Бу ҳақда «Championat.asia» хабар бермоқда.
Ўйинолди матбуот анжуманида миллий терманинг беш футболчисида сариқ карточка борлигини эслатган журналистни Самвел Бабаян хурсанд қилишга уринди: «Сизни хурсанд қила оламан, ҳозиргина ОФК вакили билан гаплашдим. Унинг айтишича, кейинги босқичда сариқ карточкалар куйиб кетади. Баҳрайнга қарши ўйинда огоҳлантириш олмасак, ҳаммаси яхши бўлади».
Маълумот учун, Баҳрайнга қарши саралаш учрашуви олдидан Ўзбекистон миллий терма жамоасининг беш нафар футболчиси — Одил Аҳмедов, Сардор Рашидов, Егор Кримец, Жавоҳир Соҳибов ва Ислом Тўхтахўжаев ҳисобида сариқ карточка бор. Тўхтахўжаев Баҳрайнга қарши ўйинда майдонга тушмаслиги мумкин.
Эслатиб ўтамиз, Ўзбекистон — Баҳрайн учрашуви 29 март, сешанба куни Тошкент вақти билан 18:00 да «Бунёдкор» стадионида бошланади.
Изоҳ (0)