Футбол бўйича Ўзбекистон ва Филиппин миллий терма жамоалари ўртасидаги ЖЧ—2018 ва Осиё Кубоги—2019 саралаши доирасидаги ўйиндан кейинги матбуот анжуманида Самвел Бабаян учрашувдаги қизил карточка Филиппинга ёрдам бергани ҳақида айтиб ўтди. Бу ҳақда «Championat.asia» нашри хабар берди.
Маълумот учун, Ўзбекистон — Филиппин учрашуви 1:0 ҳисобида мезбонлар ғалабаси билан якунига етди. Учрашувнинг 10-дақиқасида Филиппин терма жамоаси аъзоси Хосе Портериа майдондан четлатилди.
«Рақиб яхши ташкил этилган жамоа ва унда мураббийнинг қўли кўриниб турибди. Бугун беш-олти ўйинга етиши мумкин бўлган хавфли вазият ярата олдик. Бир қатор мухлислар Филиппин термасини Малайзияга тенглаштиришганда, хайрон қолгандим», — дейди Самвел Бабаян.
Учрашувнинг энг яхши футболчиларидан бири бўлган филиппинлик дарвозабон Нил Этериж ҳақида фикр билдирар экан, Ўзбекитон миллий терма жамоаси бош мураббийи унинг маҳоратига юқори баҳо берди: «Рақиб посбони Англия қуйи дивизионида ўйнайди. У ‘Челси’ мактабини тугатган. Агар бугунги беллашувни Премьер-лига жамоалари томоша қилганда, Этерижни ўз сафига қўшиб олиши мумкин эди».
«Кеча кўпчилик 7:0 га ютасизми ёки чиройли ўйин кўрсатасизми, деб сўраганида, асосий мақсад ғалаба дегандим ва биз бунга эришдик. Филиппинга паст назар билан қараш керак эмас», — дея қўшимча қилди Самвел Бабаян.
Эслатиб ўтамиз, Ўзбекистон миллий терма жамоаси ЖЧ—2018 ва Осиё Кубоги—2019 саралаши доирасидаги ўзининг навбатдаги ўйинини 29 март, сешанба куни Баҳрайнга қарши ўтказади.
Изоҳ (0)