Ўзбекистонда хизмат кўрсатган артист, таниқли сухандон ва хонанда Шуҳрат Қаюмов 22—23 март кунлари Тошкентдаги «Истиқлол» санъат саройида яккахон концерт дастурини тақдим этди. Концертда меҳмон бўлган журналист Феруз Муҳаммад ўз таассуротлари билан ўртоқлашади.
Шуҳрат Қаюмовнинг концертолди тайёргарлигида меҳмон бўлганимизда, концерт билан боғлиқ барча сирларни очиб қўймайлик, деб кўп маълумотларни баён қилмаган эдик. Концерт куни эса бизда бор маълумотлар саҳнада намойиш қилинганлари олдида деярли аҳамиятсиз бўлиб чиқди.
Шу вақтгача қайси концертда бўлмай, деярли барчаси ё техник сабабларга, ё бўлмаса номаълум ларга кўра ҳеч бўлмаса 10 дақиқа кеч бошланиш одат эди. Шуҳрат Қаюмов бунга қарши чиқиб, концертни белгиланган вақтда — 19:00 да бошлади.
Хонанда «Шукрона» деб номланган қўшиқ билан мухлислар орасидан чиқиб келди. Бу вақтда мухлислар ҳали ҳам жой қидириш билан овора эди. Эътиборли томони, «жой қидирувчи»лар орасида таниқлилар ҳам бор. «Жой қидириш» саҳнада куйланган учинчи қўшиқ — «Айрилиқ» тугагунига қадар давом этди.
Умида Мирҳамидованинг «Оқ атиргуллари» ва унга жавоб тариқасида куйланган Шуҳрат Қаюмовнинг қўшиғини мухлислар жуда яхши кутиб олишди.
Қаюмов саҳнада ўзини тутиши, маданияти, ўзига ишончи билан бугунги кўплаб санъаткорларимизга устоз бўлса арзийдиган даражада. Унинг ижросида ҳар бир қўшиқ юксак маҳорат билан куйланди. Айниқса, улар орасида оналарга бағишланган қўшиқни алоҳида такидлаш лозим.
Қўшиқдан аввал монолог ўқилди — узун, таъсирли, маҳзун, лекин умидбахш монолог. Шу вақтгача «Истиқлол» саройида она сиймосига бағишланган монологларни кўп эшитганман, аммо ҳаммаси фонограмма орқали эшиттирилган эди. Қаюмовнинг концертидаги энг баланд пардада, йиғлаб куйланган ва йиғлаб тингланган қўшиқ шу бўлди.
Дастурнинг ўртасида бир аёл уни калтаклаётган эридан қочиб саҳнага чиқди. Бу дастурнинг ўзига хос саҳна кўриниши эканлиги бизга аён эди. Баъзи бир оилаларда бўладиган келишмовчиликлар устамонлик билан, қалбларни ларзага келтирар даражада саҳнага олиб чиқилди. Ушбу саҳна кўринишига, ундан сўнг куйланган «Аёли бор» деб номланган қўшиқ уйғунлашиб кетди.
«Хотира» деб номланган қўшиқда марҳум устозлар — Ўктам Жобиров, Даврон Зуннунов, Мирзоҳид Раҳимов, Раҳматилла Мирзаев, Абдумўмин Ўтбосаров ва Дилдора Қаюмовалар ёдга олинди. Шу вақтда катта мониторда уларнинг суратлари ҳам кўрсатиб турилди. Бу қўшиқ ҳам барчани йиғлатди.
Концертда саҳнадаги раққосаларнинг ҳаракатларига гап бўлиши мумкин эмас, аммо залдаги онахонлар, аёллар, таъбир жоиз бўлса, улардан-да чиройлироқ рақсга тушди. Маромига етказилиб ижро этилган «Ўхшайди-ку», «Муножот», «Бу ҳаёт», «Кетма ёнимдан, кетма» ва бошқа тароналарга рақсга тушмасликнинг иложи ҳам йўқ эди.
Бундан йигирма йиллар илгари куйланган «Бир диктор» деб номланган қўшиқ, саҳнада яна бир бор жаранг сочди. «Шунчаки бир диктор демангиз, шунчаки бир диктор бўлсам ҳам...» мисраларидан иборат мазкур қўшиқ, менимча, аъло даражада ўтган концерт дастурига якун ясади.
Феруз Муҳаммад,«Дарё» учун махсус
Изоҳ (0)