Хонанда Шуҳрат Қаюмов оғир бетобликни бошдан кечираётган бўлса-да, 22—23 март кунлари «Истиқлол» санъат саройида бўладиган концертга тайёргарликни бир зум тўхтатмади. Журналист Феруз Муҳаммад концертолди тайёргарлик жараёнида меҳмон бўлди.
Бир ойдан зиёд вақт мобайнида тинимсиз меҳнат қилаётган созандаларда тушкунлик ёки чарчаш аломатлари умуман сезилмайди. Уларнинг завқидан, ўзлари мазза қилиб соз чалишларидан руҳингиз куй оҳангига мос ҳаракат қилгиси келади.
Рустам Азимов бошчилигидаги созандалар гуруҳи ҳар бир қўшиқ куйини ўзаро ижодий рақобат қилиб чалаётганга ўхшайди. Адашиш йўқ, ортда қолиш йўқ, ижодий мукаммаллик ва бир-бирини тўлдириш бор.
Шуҳрат Қаюмов концертида ҳар бир қўшиқ ўз тингловчисини топади — етти ёшдан етмиш ёшгача ва шу ёш оралиғи дастурда куйланаётган қўшиқларга мезон қилиб олинган. Барча қўшиқлар баланд пардаларда куйлашни тақозо қилади.
Шу ўринда Шуҳрат Қаюмовнинг йўтали ҳали ҳам қолмаганлигини, қўшиқ куйлаётган вақтда йўтали тутиб қолганлигини фотомухбиримиз ҳам бир неча бор пайқади.
Хонанда Умида Мирҳамидова билан биргаликда савол-жавоб қилиб куйланадиган «Оқ атиргуллар» концерт дастуридаги кутилмаган тароналардан бўлади. «Оқ атиргуллар» шу вақтгача қай даражада хит-парадларни ушлаб турган бўлса, бу савол-жавобдан кейин унинг умри янада узайиши аниқ.
— Умида Мирҳамидова билан биргаликда қўшиқ куйлаш, уларнинг қўшиқларига жавоб қўшиқ тайёрлаш ғояси кимдан чиқди?— Мумтоз қўшиқларни жуда яхши кўраман, шу билан биргаликда замонавий эстрада қўшиқларни ҳам тинглайман. «Оқ атиргуллар» қўшиғини жуда яхши кўрардим. Ҳар доим Умидахон бу қўшиқни кимга айтган эканлар, деб уларга бошқа одамлар жуда кўп берган саволни мен ҳам ўзимга ўзим берардим. Ҳозир оилавий можароларни эшитсангиз, йигит томон ўзича ҳақ, қиз томоннинг ҳам ўзини оқлайдиган сабаблари бор. Худди шундай бу қўшиқни ошиқ йигит тилидан бевафо қизга қарата айтилган. Яъни, «сени ўзинг бевафолик қилдинг, мен сен учун ҳалигача оқ атиргулларни ўстираман». Орадан йигирма йиллар ўтган бўлса-да, сен учун очилади сен севган атиргуллар, дея жавоб қўшиқ тайёрлаганмиз. Бу ҳақида, шундай қўшиқ куйлаш ҳақида анчадан буён ўзим ўйлаб юрар эдим.
— Сўзи ва мусиқаси ким томонидан яратилган?— Мусиқаси «Оқ атиргуллар» қўшиғининг мусиқаси, сўзи шоира Ҳилола Иброҳимовага тегишли. Бу қўшиқни репитиция вақтида дуэт ҳам қилиб кўрдик, кейин савол-жавобга келиб тўхтадик.
— Аксарият санъаткорлар «Истиқлол»да жонли концерт бермаслигига сабаб қилиб санъат саройининг техникасини кўрсатади. Бу қанчалар ўринли сабаб?— Билмадим, ҳамма ўзининг ўрганганини қилади. Мана, ўзингиз ҳам репитиция жараёнида кўрдингиз, ҳали ҳам йўталим қолмаган, қўшиқ куйлаётганимда ҳам йўтал тутиб қоляпти. Аммо нима бўлган тақдирда ҳам, ҳаракатни тўхтатганимиз йўқ. Концерт дастури кунига қадар соғайиб қоламан, деган умидим бор. Ҳаттоки, яқинларим ҳам нима учун фонограммада куйламайсиз, ўзингизни қийнаш шартми, дейишади. Аммо дастурни фонограммада қилишни, икки соат дискни қўйиб саҳнада айланиб юришни ўзимга эп кўрмадим. Сиз ҳали ҳам мени яхши бўлиб турган ҳолатимни кўряпмиз. Нима учун тайёргарлик учун айнан шу бинони танладик, чунки бу бино шифохонага яқин эди. Шифохонадан икки шогирдим икки томонимдан тутиб тайёргарликка олиб келар эди. Бу ҳолатимда фонограммадан яхшиси йўқ эди. 39—40 даражада ҳарорат билан ҳам тайёргарликни тўхтатмадик. Агар фонограмма бўлганда соз чалишни билмайдиган 4 та одамнинг қўлига чолғу асбобларини бериб, дискни қўйиб саҳнада айланиб юрар эдим.
— Ҳақиқатан ҳам ўзим гувоҳи бўлдим, тайёргарлик жараёнида қўшиқ куйлаётганингизда йўтал тутиб қоляпти. Кейинчалик бу зўриқишнинг асорати қолиши мумкин, шифокорлардан маслаҳат олдингизми?— Маслаҳат олдим, улар мумкин эмас дейишди. Санъат фидойиликни талаб қилар экан. Сурункали бронхитни тик оёқда юриб, даволанмасдан ўтказиб юборганим учун шундай ҳолатга келиб қолдим. Қаттиқ шамоллаб қолиб, иситмалаб турган куним халқаро аҳамиятга эга бўлган тадбирда бошловчлик қилишим керак эди. Ўрнимга бошқа одам ҳам топа олмадим. Демак, бу ҳам бир синов, санъат аҳли ҳамма нарсага тайёр туриши керак экан.
Изоҳ (0)