Брюсселдаги портлашлар АҚШнинг Юта штатилик 19 ёшли Мэйсон Уэллс бошидан ўтказган учинчи теракт бўлди. Шу пайтгача у ўтган йилги Париждаги фожиа ва 2013 йили Бостон марафонида рўй берган портлашлар гувоҳи бўлганди. Бу ҳақда йигитнинг отаси Чад Уэллс маълум қилди, дея хабар беради «ТАСС».
Чаднинг айтишича, 2013 йили ўғли билан бирга портлаш уюштирилган Бостон марафони финиши яқинидаги уйда турмуш ўртоғини кутаётган бўлган. Ўтган йил ноябрь ойидаги Париждаги терактлар чоғида эса Мэйсон Франция пойтахтида эди.
«Мэйсон бизни доимо хатардан холи эканлиги ва хавфсизликка риоя этаётганига ишонтирарди. Биз унга атрофидаги ҳар бир нарсага эътибор қаратиш ва бошқа мамлакатларга саёҳати давомида ҳушёр бўлишга чақирардик», — дея ҳикоя қилади йигитнинг онаси Кимберли.
Мэйсон ва унинг икки миссионер дўсти Брюссель аэропортида эканлигида портлашлар юз берган. Йигитнинг ахилл пайи узилган, юзи ва қўли шикастланган ҳамда иккинчи ва учинчи даражали куйган. Брюсселдаги терактлар чоғида АҚШнинг жами тўққиз нафар фуқароси жабрланган. Улар орасида юталик миссионерлардан ташқари, АҚШ ҳарбий-ҳаво кучлари хизматчиси ва унинг беш нафар оила аъзоси бор эди.
Изоҳ (0)