Boston va Parijdagi teraktlarni boshidan kechirgan amerikalik yigit Bryusseldagi portlashlarda yaralandi
Bryusseldagi portlashlar AQShning Yuta shtatilik 19 yoshli Meyson Uells boshidan o‘tkazgan uchinchi terakt bo‘ldi. Shu paytgacha u o‘tgan yilgi Parijdagi fojia va 2013-yili Boston marafonida ro‘y bergan portlashlar guvohi bo‘lgandi. Bu haqda yigitning otasi Chad Uells ma’lum qildi, deya xabar beradi “TASS”.
Chadning aytishicha, 2013-yili o‘g‘li bilan birga portlash uyushtirilgan Boston marafoni finishi yaqinidagi uyda turmush o‘rtog‘ini kutayotgan bo‘lgan. O‘tgan yil noyabr oyidagi Parijdagi teraktlar chog‘ida esa Meyson Fransiya poytaxtida edi.
“Meyson bizni doimo xatardan xoli ekanligi va xavfsizlikka rioya etayotganiga ishontirardi. Biz unga atrofidagi har bir narsaga e’tibor qaratish va boshqa mamlakatlarga sayohati davomida hushyor bo‘lishga chaqirardik”, — deya hikoya qiladi yigitning onasi Kimberli.
Meyson va uning ikki missioner do‘sti Bryussel aeroportida ekanligida portlashlar yuz bergan. Yigitning axill payi uzilgan, yuzi va qo‘li shikastlangan hamda ikkinchi va uchinchi darajali kuygan. Bryusseldagi teraktlar chog‘ida AQShning jami to‘qqiz nafar fuqarosi jabrlangan. Ular orasida yutalik missionerlardan tashqari, AQSh harbiy-havo kuchlari xizmatchisi va uning besh nafar oila a’zosi bor edi.
