Бразилия президенти Дилма Руссефф ўзининг мамлакат собиқ етакчиси Луис Инасиу Лула да Силва билан телефон суҳбатининг тингланишини ноқонуний деб атади. Бундай баёнот билан давлат раҳбари Баия штатига сафари чоғида чиқиш қилди, деб ёзади «ТАСС».
«Кўплаб мамлакатларда президент суҳбатларини Олий суд рухсатисиз тинглайдиганлар қамоққа жўнатилади. АҚШ президентини яширинча тинглаб кўринг-чи, шунда нима бўлишини кўрасиз», — деди Руссефф.
16 март, чоршанба куни ОАВлар Федерал полиция томонидан ёзиб олинган аудиоёзувни эълон қилди, унда Руссефф ва Лула да Силванинг ўзаро суҳбатини эшитиш мумкин. Суҳбат чоғида давлат раҳбари мамлакат собиқ етакчисига унга ўз фуқаролик канцелярияси раҳбарлигига тайинлангани ҳақидаги ҳужжатларни юборишини, уларни «зарур бўлганда» ишлатиши мумкинлигини айтган.
Амалдаги ҳукумат душманлари аудиоёзувни Руссеффнинг ўз сиёсий устозини ва партиядошини қамоқдан ҳукуматдаги лавозим орқали қутқаришга уриниши дея талқин қилди: бир неча кун аввалроқ прокуратура собиқ президентга қарши пул ювиш айбини илгари сурган ва судга уни ҳибсга олиш ҳақида сўров юборган эди.
Руссефф ушбу версияни бутунлай рад этди: унинг сўзларига кўра, ҳужжат Лула да Силвага имзолаш учун юборилган, чунки у лавозимга киришиш маросимида қатнашиш-қатнашмаслигига ишончи комил бўлмаган.
Изоҳ (0)