Ойни ўзлаштиришнинг бирламчи босқичи — катта бўлмаган доимий база қурилиши нисбатан қиммат бўлмаган ва тезкор лойиҳа бўлиши мумкин. NASA экспертлари, жумладан, астробиолог Крис Маккей шундай хулосага келган, дея хабар беради «Интерфакс».
New Space журналида эълон қилинган мақолада Маккей шундай лойиҳага оид ҳисоб-китобларни келтирган. Унга кўра, база қурилиши 10 миллиард долларга тушиши (бу замонавий авиаташувчи нархидан ҳам арзонроқ) ва 2022 йил охирига қадар якунланиши мумкин.
Ойдаги фаолият тажрибасидан олимларни Ернинг йўлдошидан кўра кўпроқ қизиқтирадиган Марсдаги тадқиқотларда ҳам фойдаланиш кўзда тутилган. NASA режаларига Марсга 2030 йилларда амалга оширилиши мўлжалланган инсон иштирокидаги парвоз киритилган.
Маккей ва унинг ҳамкасблари лойиҳасида бир жамоанинг Ойда доимий истиқомат қилиши кўрсатиб ўтилмаган: таркиб йилда бир неча бор ўзгариши мумкин, шу билан бирга, базанинг ўзи доимий тарзда ишлайди.
Изоҳ (0)