Суриянинг Хасака вилоятидаги Румайланда ўтган съездда иштирок этган 30 дан ортиқ сиёсий партия аъзолари мамлакат шимолида минтақавий федератив маъмурият ташкил этилганини расман эълон қилди. Бу ҳақда, «Фират» агентлигига асосланиб, «ТАСС» хабар бермоқда.
«Демократик федератив Сурия — халқларнинг биргаликдаги ҳаёти ва биродарлиги кафолати» шиори остида ўтган форумда 200 делегат иштирок этди. Улар орасида Суриянинг шимолий ва шимоли-шарқий қисмида яшовчи курдлар, араблар, туркманлар, оссурияликлар, черкеслар ва арманиларнинг вакиллари бор.
Ғарбий Курдистон (Рожава) ташқи ишлар дирекциясининг расмий вакили Идрис Наъсон бу қарорга изоҳ бераркан, курдларнинг Сурияга географик эътирозлари йўқлигини билдирди.
«Шимолий федератив ҳудуд Суриянинг бир қисми бўлиб қолаверади», — деди у.
Шунингдек, Наъсон Женевадаги музокаралар натижаларига кўра тузиладиган ҳукумат таркибига курдларнинг вакиллари ҳам киришини айтиб ўтди.
Ўз навбатида, Сурия ТИВ тарқатган махсус баёнотда федераллашув билан боғлиқ ҳар қандай масалани кўтариш мамлакатнинг ҳудудий яхлитлигига дахл қилишга тенглаштирилиб, конституцияга ва халқаро қонунчиликка зид ҳаракат сифатида кўрилиши таъкидланади.
«Бу йўналишдаги ҳар қандай баёнот қонуний кучга эга бўлмай, юридик, иқтисодий ва ижтимоий натижалар келтирмайди, негаки Сурия халқининг нияти ва мақсадини акс эттирмайди», — дейилади ҳужжатда.
Туркия ташқи ишлар вазирлиги ҳам вазиятга шу позициядан туриб баҳо бермоқда.
Изоҳ (0)