Россияда бўлиб ўтадиган футбол бўйича 2018 йилги Жаҳон чемпионатига Осиё қитъаси жамоалари саралашининг учинчи босқичи учун қуръа ташлаш маросими муддати маълум бўлди, деб хабар бермоқда Ўзбекистон футбол федерацияси матбуот хизмати.
Қуръа маросими 2016 йилнинг 12 апрель куни, Малайзия пойтахти Куала-Лумпур шаҳрида бўлиб ўтади.
Унда иккинчи саралаш босқичидан ўтган 12 терма жамоа олтитадан икки гуруҳга ажратилади. Гуруҳларда биринчи ва иккинчи ўринни қўлга киритган тўрт жамоа Жаҳон чемпионати йўлланмасини қўлга киритади. Учинчи ўрин соҳиблари эса ўзаро ўйин ўтказиб, ғолиб жамоа ФИФА қарорига кўра бошқа конфедерация вакилига қарши саралашнинг сўнгги учрашувини ўтказади.
Эслатиб ўтамиз, Ўзбекистон миллий терма жамоасининг Жаҳон чемпионатига иккинчи саралаш босқичи сўнгги икки ўйини Тошкентдаги «Бунёдкор» стадионида бўлиб ўтади. 24 март куни Филиппинга қарши ҳамда 29 март куни Баҳрайнга қарши бўладиган ўйинлари 18:00 да старт олади.
Маълумот учун, сўнгги икки ўйин олдидан Ўзбекистон терма жамоаси «H» гуруҳида олти учрашув ўтказиб, 15 очко тўплаган ҳолда иккинчи ўринни эгаллаб турибди. Етти учрашувда 16 очко жамғарган КХДР термаси гуруҳда пешқадамлик қилмоқда.
Изоҳ (0)