Ўзбекистонда 2016 йил 1 мартдан янги таҳрирдаги Йўл ҳаракати қоидалари амал қилишни бошлади. Янги қоидаларга кўра, ҳайдовчи ҳаракатланишни бошланишидан олдин йўловчиларни хавфсизлик камарини тақиб олиш ҳақида огоҳлантириш зарур.
Facebook’даги «Водители Ташкента» гуруҳи аъзолари Тошкент шаҳридаги автомобилларда кўринган хавфсизлик камарини тақиб олиш билан боғлиқ эълонларнинг суратларини эълон қилди.
Эълонларнинг бирида: «Илтимос, ‘ременъни тақиб олинг!», — деб ёзилган ва унга хавфсизлик камари қандай тақилиши кўрсатилган суратчалар илова қилинган.
«Буниси лицензияли таксида олинган фотосурат, баракалла!», — деб ёзади «Водители Ташкента» гуруҳи аъзоси бошқа суратни эълон қиларкан. Иккинчи эълонда ҳам йўловчи қаратилган «Хавфсизлик камарини тақиб олинг» талаби ўзбек ва рус тилларида ёзилган.
Йўл ҳаракати қоидаларининг 9-бандига мувофиқ, конструкциясида хавфсизлик камари назарда тутилган транспорт воситалари ҳаракатланиб бораётганда, ҳайдовчи хавфсизлик камарини тақиб олиши шарт. Қоидаларнинг мазкур бандига кўра, қуйидаги шахсларга хавфсизлик камарини тақмасликка рухсат берилади:
- автомобилнинг орқа ўриндиғидаги 12 ёшгача бўлган болалар;
- транспорт воситасини ўқувчи бошқараётган вақтда автомототранспорт воситасини ёки шаҳар электр транспортини бошқаришни ўргатувчи амалий машғулотлар инструктори;
- ҳомиладор аёллар, саломатлиги хавфсизлик камари тақиш имконини бермайдиган бемор йўловчилар;
- орқага ҳаракатни амалга ошираётган ҳайдовчилар;
- аҳоли пунктларида ҳаракатланишда — йўналишли такси ҳайдовчилари, таксининг орқа ўриндиғидаги йўловчилар;
- аҳоли пунктларида ташқи қисмига махсус рангли график чизмалар чизилган транспорт воситалари ҳайдовчилари ва йўловчилари.
Изоҳ (0)