Facebook’даги «Водители Ташкента» гуруҳида Тошкентдаги Германия элчихонаси яқинидаги автотураргоҳ олдида 11 март, жума куни юз берган йўл-транспорт ҳодисаси видеоёзуви эълон қилинди.
Видеоёзув автотураргоҳнинг кузатув камераларидан олинган. Унда Toyota Prado автомобили «Матонат» ҳайкали тарафдан келиб, қарама-қарши ҳаракат йўналишларини ажратувчи чизиқни босиб ўтгани ҳолда, автотураргоҳ томон бурилишга урингани, бу вақтда қарама-қарши қатнов қисмидан келаётган BMW седани Toyota Prado’га бориб урилганини кўриш мумкин.
Йўл-транспорт ҳодисаси юз берганидан сўнг, BMW’дан эркак киши тушиб келган, атрофдаги одамлар ҳар икки автомобиль ҳайдовчиларига ёрдамга шошилганини кўриш мумкин. Ижтимоий тармоқларда қолдирилган хабарларга кўра, Toyota Prado йўлтанламаси аёл ҳайдовчининг бошқарувида бўлган.
Видеохабар остида фикр билдирганларнинг аксарияти Toyota Prado бурилган нуқтада қарама-қарши ҳаракат йўналишлари қандай чизиқ билан ажратилгани борасида тортишган, аксарият фойдаланувчилар қатнов қисмлари сидирға чизиқ билан ажратилганини таъкидлаган.
Айни вақтда, баъзи фойдаланувчиларнинг фикрича, йўлнинг шу қисми узуқ-узуқ чизиқлар билан ажратилган тақдирда ҳам, Toyota Prado дастлаб қарама-қарши қатнов қисмидан келаётган автомобилларни ўтказиб юбориб, сўнг ҳаракатни давом эттириши керак эди.
Маълумот учун, ҳодиса оқибатида жабрланганлар тўғрида аниқ маълумот йўқ. BMW’ни бошқариб борган эркакнинг турмуш ўртоғи «Водители Ташкента» гуруҳида эри соғ-саломат экани ҳақида хабар қолдирган.
Изоҳ (0)