Россия қамоқхоналардаги ўлим сони бўйича Европада етакчи ўринлардан бирида турибди: мазкур кўрсаткич ҳар 1000 нафар маҳбусга 6 кишига тўғри келади (бошқа мамлакатларда ўртача 2,8 га тенг). 2013 йили қамоқхоналарда 4200 киши ўлган, улардан 461 нафари жонига қасд қилган. Бу ҳақда Европа Кенгаши томонидан тайёрланган, тузилма таркибига кирувчи 47 давлат жазони ўташ муассасаларидаги ҳолатга бағишланган маърузада маълум қилинган, дея хабар беради «РБК».
Россия маҳбуслар сони бўйича пешқадамлик қилмоқда — 2014 йилда улар 671 минг кишини ташкил этган (2016 йил 1 февраль ҳолатига 646 минг) ва 100 минг аҳолига 467 нафар маҳбусга тўғри келган. Таққослаш учун, Буюк Британияда бу кўрсаткич тахминан 150 нафар маҳбусга тенг.
Мамлакатда ҳибсда сақлашнинг ўртача муддати 5 дан 10 йилгачани ташкил этади, маҳбусларнинг 36,8 фоизи шундай муддатли жазони ўтамоқда. Шунингдек, Россия қотиллик учун қамалганлар сони бўйича ҳам етакчилик қилаётгани қайд этилган.
Изоҳ (0)