6 мартга ўтар кечаси супероғир вазн тоифасида Жаҳон бокс ассоциацияси (WBA)нинг мунтазам чемпиони ҳисобланган ўзбекистонлик Руслан Чагаев австралиялик Лукас Браунга қарши жанг ўтказди. Грознийдаги «Колизей» Спорт-Холлида бўлиб ўтган жангда Руслан Чагаев 12 раундлик жангнинг 10-раундида техник нокаутга учраб, чемпионлик камарини бой берди, деб хабар беради «ТАСС».
Жанг Чагаевнинг устунлигида ўтди ва 6-раундда у Браунни нокдаунга учратиб, муддатидан аввал жангни якунлаши мумкин эди. Бироқ, австралиялик боксчи жангни давом эттира олди.
10-раундга келиб австралиялик боксчи Чагаевга бир нечта аниқ зарбалар йўллади. Учрашув рефериси жангни тўхтатиб, техник нокаут қайд этди ва ўзбекистонлик боксчи чемпионлик камаридан маҳрум бўлди.
Шундай қилиб, Чагаев фаолиятидаги 3-мағлубиятини қабул қилди. Унинг ҳисобида 34 та ғалаба (21 таси нокаут билан) ва битта дуранг ҳам бор. Браун эса фаолияти давомида 24 марта ғалаба қозонган (21 та нокаут) ва бирор марта мағлубиятга учрамаган.
Изоҳ (0)