Одил Аҳмедов 2015 йилда Ўзбекистоннинг энг яхши футболчиси деб топилди

Ўзбекистон миллий терма жамоаси ҳамда Россиянинг «Краснодар» клуби ярим ҳимоячиси Одил Аҳмедов ОАВ вакиллари орасида ўтказилган сўровга кўра, Ўзбекистоннинг 2015 йилдаги энг яхши футболчиси деб топилди. Бу ҳақда Ўзбекистон футбол федерацияси матбуот хизмати хабар бермоқда.

«Краснодар» клуби аъзоси ўтказилган сўров натижаларига кўра, мазкур соврин учун курашда яқин таъқибчилари Қатарнинг «Ал-Жаиш» клубида тўп сураётган Сардор Рашидов ҳамда ўтган мавсум якунларига кўра «Пахтакор» сафида Ўзбекистон чемпионати олтин медалини қўлга киритган Игорь Сергеевни ортда қолдирди.

Таъкидлаш лозим, айни дамда Россиянинг «Краснодар» сафида тўп сураётган Аҳмедов учун мазкур соврин фаолиятидаги тўртинчиси ҳисобланади. Бунгача Аҳмедов 2009, 2011 ҳамда 2014 йилларда Ўзбекистонда йил лауреати бўлган эди.

ОАВ вакиллари овозига кўра Ўзбекистоннинг энг яхши футболчилари кучли учлиги қуйидагича кўриниш олди:

1. Одил Аҳмедов («Краснодар», Россия) – 50 очко
2. Сардор Рашидов («Ал-Жаиш», Қатар) – 32 очко
3. Игорь Сергеев («Пахтакор», Ўзбекистон) – 21 очко

• Самвел Бабаян Ўзбекистоннинг 2015 йилдаги энг яхши мураббийи деб топилди

• Игорь Сергеев 2015 йилги Ўзбекистон чемпионатининг энг яхши тўпурари бўлди

• Артур Геворкян 2015 йилги Ўзбекистон чемпионатининг энг яхши футболчиси деб топилди