Европа иттифоқи Туркияда Feza Media Group билан боғлиқ ҳодисаларни, шу жумладан, Zaman газетасини ва полициянинг нашрга нисбатан муносабатини диққат билан кузатмоқда. Бундай баёнот билан Европа ташқи сиёсий хизмати (ЕТХ) расмий вакили чиқиш қилди, деб ёзади «Ведомости».
«Евроиттифоққа аъзо бўлиш учун номзод мамлакат сифатида Туркия юқори демократик стандартларни, шу жумладан, оммавий ахборот воситалари эркинлигини ҳурмат қилиши кераклиги ҳақида ЕИ кўп марта айтиб ўтган», — дейилади ЕТХ Брюсселда тарқатган коммюникеда.
Ҳужжатда таъкидланишича, ҳар қандай мамлакат, айниқса, Евроиттифоққа қўшилиш ҳақида музокаралар олиб бораётган давлат асосий ҳуқуқларни, жумладан, фикр билдириш эркинлигини, шунингдек, Инсон ҳуқуқлари бўйича Европа конвенцияси юридик меъёрларига мувофиқликни кафолатлаши керак.
Нашр эслатишича, 4 март куни Туркия ҳукумати расмий ахборотдан фарқли бўлган фикрларни чоп этган Feza Media Group холдинги ва Zaman газетасига нисбатан босим қўллади. Холдингга нисбатан ташқи бошқарув жорий қилинди. Полиция холдинг бош қароргоҳини тинтув қилди. Истанбулда ҳукумат хатти-ҳаракатларига қарши бошланган норозилик акцияси полиция томонидан шафқатсизлик билан бостирилди, намойишчиларга қарши кўзни ёшлантирувчи газ қўлланилди.
Изоҳ (0)