Чақалоқлар овқатланиш рационига ер ёнғоқ ва тухум каби аллерген маҳсулотларнинг киритилиши уларда келгусида аллергия пайдо бўлиши хавфини камайтиради. Лондондаги Сент-Жорж университети, қироллик коллежи тадқиқотчилари ва «Гайс энд Сент-Томас» касалхонаси мутахассислари шундай хулосага келди. Бу ҳақда «ТАСС» хабар бермоқда.
Ўтказилган тадқиқот доирасида олимлар Англия ва Уэльсдаги 1,3 минг нафар чақалоқни кузатган. Улар икки гуруҳга бўлинган: биринчи гуруҳдаги чақалоқлар олти ойгача фақат кўкрак сути билан боқилган ва шундан кейингина уларнинг рационига аллерген маҳсулотлар киритилган. Иккинчи гуруҳдаги болакайлар эса уч ойлигидан бошлаб кўкрак сутига қўшимча олти турдаги аллерген маҳсулотлар — қайнатилган тухум, сут, буғдой, ер ёнғоқ, балиқ ва кунжут билан боқилган.
Шундан сўнг олимлар болаларни уч йил давомида кузатган ва иккинчи гуруҳ вакилларида аллергия ривожланиши хавфи биринчи гуруҳдагиларга нисбатан 67% кам бўлганини аниқлади. Масалан, олти ой давомида фақат кўкрак сути берилган болаларнинг 5,5 фоизи тухумга тоқат қилолмасликларини намойиш этган, иккинчи гуруҳда эса бу кўрсаткич 1,4 фоиздан ошмаган. Ер ёнғоқ билан боғлиқ натижалар эса бундан ҳам ажабланарли бўлган: дунёдаги энг кучли аллергенлардан бири ҳисобланадиган ушбу маҳсулотни уч ойлигидан бошлаб қабул қила бошлаган 310 нафар гўдакдан ҳеч бирида кейинчалик ер ёнғоққа аллергия пайдо бўлмаган.
Олимлар маҳсулотларга иммунитет чақалоқларга уларни маълум бир меъёр билан — ҳафтасига камида 2 грамм ер ёнғоқ ёки тухум оқи протеини берилганида шаклланишини аниқлаган.
Изоҳ (0)