КХДР раҳбарияти мамлакатга қарши санкцияларни кучайтириш мақсадида БМТ Хавфсизлик Кенгаши тарафидан қабул қилинган янги резолюцияни «халқ республикаси суверенитети асосларига болта урувчи» «мислсиз, гангстерча» ҳужжат деб ҳисоблайди. Бу ҳақда Корея марказий телеграф агентлиги томонидан 4 март, жума куни тарқатилган хабарда айтилди, деб маълум қилади «ТАСС».
«КХДРнинг мустақиллик ҳуқуқини қонундан ташқари қўймоқчи бўлаётган америкалик империалистлар ва уларнинг тарафдорларининг хатти-ҳаракатлари ўта жирканч даражага етиб келди.. Улар КХДРнинг ядровий тутиб туриш кучларини мустаҳкамлаш ва бортида ‘Кванмёнсон-4’ сунъий йўлдоши бор ташувчи ракетасининг қонуний учирилишига қарши санкциялар жорий қилиш тўғрисидаги мислсиз, гангстерча резолюцияни маъқуллади», — дейилади хабарда.
«Бу шароитда КХДР халқи ва армияси ғазаб ила америкалик империалистлар ва жанубий кореялик сотқинлар қиёфасидаги мамлакат душманларини йўқ қилиш тўғрисидаги буйруқни ижро қилишга тайёрдир», — дея қўшимча қилинган хабарда.
Эслатиб ўтамиз, 2 март куни Хавфсизлик Кенгаши иштирокчилари Шимолий Кореянинг ядровий синовлари муносабати билан унга қарши санкцияларни кучайтиришга қаратилган резолюцияни бир овоздан қабул қилди.
Изоҳ (0)