Марсдаги «Фарсида гумбази» вулқонининг фаоллиги 3,7 миллиард йил аввал ушбу сайёранинг айланиш ўқига таъсир кўрсатган. Бу ҳақда Nature журналига таяниб, «Интерфакс» маълум қилди.
«Фарсида гумбази» асосининг диаметри 150, баландлиги эса 9 километр бўлган сўнган вулқон, бундан 3,71 миллиард йил аввал ҳосил бўлган. Париж—жануб XI университети олимлари сайёра ўқи айланишининг «Фарсида гумбази» шакллангунича бўлган ҳолатини компьютер орқали моделлаштирди. Гравитация ва топография манбалари асосида тадқиқотчилар олдин мавжуд бўлган палеоқутблар жойлашувини аниқлади. Натижада олимлар вулқон Марс айланиш ўқини салкам 20 даражага «оғдирган», деган хулосага келди.
Уларнинг фикрича, вулқон сайёрадаги бошқа жараёнларга ҳам таъсир кўрсатган. «Қутбларнинг жилиши Марс магнит майдони кучсизланишига сабаб бўлганми? Бу сайёра атмосфераси йўқолишига олиб келганми? Мазкур саволларга жавоблар ҳозирча бизга маълум эмас», — дейди тадқиқотчилардан бири.
Изоҳ (0)