Аргентина термаси ва «Наполи» собиқ футболчиси Диего Марадона ФИФА президентлигига Жанни Инфантино сайланишини юзасидан изоҳ берди, деб ёзади «Чемпионат».
Марадона Инфантинони фирибгар деб ҳисоблайди ҳамда у ФИФА собиқ раҳбари Йозеф Блаттер ва УЕФАнинг лавозимидан четлаштирилган президенти Мишель Платини билан боғлиқ барча ишлардан хабардор бўлганига ишончи комил.
«Инфантино — хоин ва бунинг учун жавоб беради. АҚШ ФИФА ишини текширишни ҳали якунламади. Инфантино Блаттер ва Платинининг барча хатлари билан шуғулланган. Наҳотки у ҳеч нарсани билмаган бўлса? Бунинг учун аҳмоқ ёки қариб, қувватдан қолган бўлиш керак. У ўз хўжайини Платинини ҳимоя қилиш учун ФИФА президенти бўлди», — деди Марадона.
26 февраль, жума куни Швейцариянинг Цюрих шаҳрида ФИФАнинг янги раҳбарини тайинлаш учун сайлов бўлиб ўтди. Унда УЕФА бош котиби лавозимида фаолият олиб борган Жанни Инфантино ғолиб бўлди. Инфантино сайловнинг иккинчи турида 115 та овоз тўплаб, ғолибликни қўлга киритди ва 4 йилга ФИФА президенти этиб сайланди.
Изоҳ (0)