Африка футбол конфедерацияси (CAF) раҳбари, ФИФА президенти вазифасини собиқ бажарувчи, камерунлик Исса Ҳаяту халқаро футбол ташкилотида ислоҳотларни муваффақиятли илгари сургани учун олтита рақамга тенг миқдорда маблағ олган. Бу ҳақда Bloomberg манбаларига таяниб, «ТАСС» хабар бермоқда.
Ҳаятунинг ФИФА президенти вазифасини бажарувчи лавозимидаги маоши ташкилотнинг 26 февралда бўлиб ўтган конгрессида ижроия қўмитанинг аксарият аъзолари томонидан маъқулланган туркум ислоҳотларни тасдиқлашига боғлиқ бўлган. То бу жараён амалга ошгунча Ҳаяту фақат маош олган, ислоҳотларга розилик бергани учун унга маошидан анча зиёд миқдордаги олти рақамли маблағ берилган.
Ўтган йил декабри аввалида ижроия қўмита швейцариялик юрист Франсуа Каррар бошчилигидаги махсус қўмита томонидан бир неча ой давомида ишлаб чиқилган бир қатор таклифларни ёқлади. Асосий қарорлар қаторида ижроия қўмита ўрнига ФИФА кенгаши тузилиши, халқаро футбол ташкилоти президенти ваколат муддатини 12 йил билан чеклаш, қўмиталар сонини 26 тадан 9 тагача қисқартириш ва камида йилда бир марта ФИФА конференциясини ўтказиш каби таклифларни санаб ўтиш мумкин.
Ислоҳотлар жараёни 2018 йил охиригача тўлиқ якунланиши режалаштирилган.
Эслатиб ўтамиз, Исса Ҳаяту 2015 йил октябрь ойида ФИФА президенти вазифасини вақтинча бажарувчи этиб тайинланган эди. 26 февраль, жума куни Жанни Инфантино ташкилотнинг янги президенти этиб тайинланди.
Изоҳ (0)