Россиянинг A321 самолёти қулаганидан сўнг Миср сайёҳлик соҳаси 1,3 миллиард доллар йўқотди

Россиянинг A321 лайнери қулаганидан сўнг Мисрнинг сайёҳлик соҳасидаги даромади тахминан 1,2—1,3 миллиард долларга камайган. Бу ҳақда мамлакат бош вазири Шариф Исмоил маълум қилди, дея хабар беради «Интерфакс».

«Авиаҳалокатдан сўнг уч—тўрт ой ичида 1,2 ёки 1,3 миллиард доллар йўқотдик», — дея таъкидлаган бош вазир.

2015 йил 30 июнда якунланган ўтган молия йилида Мисрнинг туризм орқали топган фойдаси 7,3 миллиард долларни ташкил этди, бу мамлакатга импорт қилинадиган масулотларнинг 12 фоизига тенг. Сайёҳлик соҳасидаги муаммолар мамлакатга келадиган валюта оқими кескин камайиши ва қора бозорда Миср фунти курси тушиб кетишига сабаб бўлди.

Мамлакат молия вазирлиги жорий молия йили учун ялпи ички маҳсулот ўсиши башоратини «5 фоиздан зиёд»дан 4—4,25 фоизгача камайтирди ва буни A321 ҳалокатидан сўнг сайёҳлик соҳасида вазият ёмонлашгани билан изоҳлади.

Эслатиб ўтамиз, 2015 йилнинг 31 октябрь куни Россиянинг «Когалимавиа» компаниясига тегишли Airbus A321 самолёти Синайда қулади. Бортда бўлган 217 йўловчи ва экипажнинг етти нафар аъзоси ҳалок бўлди. Миср президенти февраль ойида A321 лайнери ҳалокатига теракт сабабчи бўлганлигини биринчи марта тан олди.