Россия президенти матбуот котиби Дмитрий Песков мамлакат федерал телеканалларининг Москвада энагаси томонидан ўлдирилган тўрт ёшли қиз ҳақида хабар бермаслик қарорини қўллаб-қувватлашини маълум қилди. Бу ҳақда у «РБК»га берган интервьюсида айтиб ўтди, дея хабар бермоқда Meduza.
Ҳукумат телеканалларга шов-шувли қотиллик ҳақида хабар қилмаслик ҳақида кўрсатма бергани ҳақидаги гап-сўзларни изоҳларкан, Песков шундай деди: «Йўқ, бундай эмас. Каналларнинг ўзи ақлдан озганларни кўрсатмади. Лекин биз уларни қўллаб-қувватлаймиз».
«РБК» маълумотларига кўра, Россия Биринчи канали, «Россия-1», «НТВ» каби федерал каналларнинг янгиликлар дастурида мазкур жиноят ҳақида хабар берилмаган. «Рен-ТВ» телеканали эса фақат 12:30 даги янгиликлар дастурида бу жиноят ҳақида хабар қилган.
«Турли федерал каналларнинг икки ходими томонидан ‘РБК’га берилган маълумотга кўра, телеканалларга боланинг ўлдирилиши ҳақидаги лавҳаларни бермаслик ҳақида тавсия келган. ‘РБК’ суҳбатдошларининг тушунтиришларидан шу нарса аён бўладики, ҳукумат вакиллари мазкур жиноят сабаб миллий масалага эътибор қаратилишидан хавотир олган», — дейилади «РБК» хабарида.
29 февраль куни Москва шимоли-ғарбидаги ёнғин юз берган хонадонда бошсиз қизнинг танаси топилди. Орадан бир неча соат ўтиб «Октябрьское поле» метро бекатида шу қизнинг энагаси, ўзбекистонлик Гулчеҳра Бобоқулова ҳибсга олинган. Хабар беришларича, унинг қўлида қизчанинг боши бўлган. Кейинроқ, «Интерфакс» хабарига кўра, аёл айбига иқрор бўлиб, кўрсатма берган.
Изоҳ (0)