Франция жанубида жойлашган Ним шаҳридан қадимий қабрлар топилди. Ўзбекистон мусулмонлари идораси расмий веб-портали ахборотига кўра, қабрлардаги марҳумлар мусулмонларга хос тарзда — боши Қиблага қаратиб дафн этилган.
Текширувлар натижасида марҳумларнинг Шимолий Африка халқларига мансуб экани ва VII—IX асрга тегишлилиги маълум бўлди. Олимлар суяк қолдиқларига асосланиб, марҳумларнинг қайси жинс вакили экани ва неча ёшда вафот этганини ҳам аниқлаган.
Мутахассислар тахминига кўра, марҳумлар берберлар халқига мансуб. Қайд этиш жоиз, VIII асрда Ним шаҳри бир муддат Уммавийлар халифалиги назорати остида бўлган, берберлар эса уларнинг ёлланма жангчилари эди.
«Вести»га кўра, мазкур топилма Европа ҳудудидаги энг қадимий мусулмон қабрлари бўлиши мумкин. «Regnum»нинг қайд этишича, бу қабрлар Араб-Шимолий Африка вакилларининг илк ўрта асрларда Европада бўлганини тасдиқловчи ҳозирча ягона моддий далилдир.
Изоҳ (0)