Жавоҳир Зокиров «Барон» фильмининг давоми «ҳар қандай вазиятда ҳам» суратга олинишини маълум қилди

Актёр Жавоҳир Зокиров «Барон» фильмининг давоми суратга олинишини ишонч билан таъкидлади. Бу ҳақда актёр «Даракчи» нашри томонидан ташкил этилган «Юлдуз-онлайн» лойиҳасида маълум қилди.

Лойиҳада нашр ўқувчиларидан бири томонидан берилган: «‘Барон’ фильми ‘видеоқароқчилар’ томонидан тарқатиб юборилганидан сўнг, режиссёр Рустам Саъдиев унинг давомини суратга олармикин?», — деган саволга, Жавоҳир Зокиров: «‘Барон’ фильмининг давоми ҳар қандай вазиятда ҳам суратга олинади», — деб жавоб берди.

Маълумот учун, режиссёр Рустам Саъдиев томонидан суратга олинган ва 2016 йил январида катта экранларга чиққан «Барон» фильмида актёр Жавоҳир Зокиров асосий роллардан бири — Миллий хавфсизлик хизмати зобити ролини ижро этган.

Аввалроқ Рустам Саъдиев томошабинларни «Барон» фильмини кинотеатрларда томоша қилишга чақирган эди. «Фильмнинг давомини суратга олишим ва ўзбек киносининг янада ривожланиши, шубҳасиз, кинотеатрларга келаётган томошабинларга боғлиқ», — деганди режиссёр.

Жавоҳир Зокиров сўнгги икки йил ичида «Барон»дан ташқари, Рустам Саъдиевнинг бошқа бир фильми — «Сотқин»да ҳам суратга тушди. «Сотқин»нинг намойишлари бўлиб ўтганидан сўнг, Жавоҳир Зокиров мазкур фильмнинг давоми олиниши мумкинлигини айтиб ўтган эди.