Рейтинг: «Истиқлол» санъат саройидаги энг қиммат концерт дастурлари

2016 йилги концертлар мавсуми бошланганига кўп бўлгани йўқ. Ҳозиргача Гулсанам Мамазоитова, опа-сингил Асалхўжаеваларнинг концертлари ўтиб бўлди, Райҳоннинг концерти давом этмоқда. Майгача давом этадиган концертлар мавсумининг энг кўп кунлик дастурлари рейтинги аввалроқ эълон қилинган эди.

Аксарият концертлар «Истиқлол» санъат саройида ташкил этилади. Журналист Феруз Муҳаммад мазкур саройда бўлиб, чипталарнинг «Истиқлол» кассасидаги нархлари асосида энг қиммат концертлар рейтингини тайёрлади.

8—11-ўринлар. «Ҳандалак» қизиқчилари; Шуҳрат Қаюмов; Ғуломжон Ёқубов; «Мирзо» театри

«Истиқлол» санъат саройида 28—29 февраль кунлари «Ҳандалак» гуруҳи қизиқчиларининг, 1—2 март кунлари Ўзбекистон халқ артисти Ғуломжон Ёқубовнинг, 22—23 март кунлари хонанда Шуҳрат Қаюмовнинг, 30 март — 3 апрель кунлари эса «Мирзо» театрининг концерт дастурлари бўлиб ўтади. Мазкур концертларнинг энг арзон чиптаси 10 минг сўмдан бошланади, энг қиммати эса 70 минг сўм.

7-ўрин. Дилдора Ниёзова

Хонанданинг 25—27 март кунлари бўлиб ўтадиган концерт дастурларига кириш чипталари нархи 10 минг сўмдан 80 минг сўмгача фарқланади.

5—6-ўрин. Зулайҳо Бойхонова; Равшан Комилов

7—8 март кунлари Зулайҳо Бойхонованинг, 9—10 март кунлари эса Равшан Комиловнинг яккахон концерт дастури бўлади. Кириш чипталарининг нархи 15 минг сўмдан бошланиб, 100 минг сўмгача кўтарилади.

4-ўрин. Озодбек Назарбеков

10—20 апрель кунлари «Истиқлол» санъат саройида Озодбек Назарбековнинг «Меҳринг сабаб» номли концерт дастури бўлиб ўтади. Кассада энг арзон чипта — 15 минг сўм. Энг қиммати — 140 минг сўм.

3-ўрин. «Азиз ва муқаддасан аёл»

8 март — Халқаро хотин-қизлар куни муносабати билан ҳар йили анъанавий тарзда ташкил этиладиган «Азиз ва муқаддассан аёл» концерт дастури бу йил 2016 йил 3—5 март кунлари бўлиб ўтади. Чипталар 15 минг сўмдан 150 минг сўмгача нархда.

2-ўрин. Райҳон

23 февраль куни Райҳоннинг яккахон концерт дастури бошланди. 27 февралгача давом этадиган шоунинг кириш чипталари 30 минг сўмдан 180 минг сўмгача нархларда сотилди.

1-ўрин. Шаҳзода

Шаҳзоданинг 1—7 май кунлари бўлиб ўтадиган концерт дастури учун энг арзон чипта нархи 15 минг сўм, энг қиммати эса 200 минг сўм. Бу қолган концерт дастурлари орасида ҳам энг қиммат нархдир.