«Мен ҳам аёлман, менда ҳам кўнгил бор». Дилноза Кубаева Instagram’даги «саҳифалари» ва алдоқчи журналистлар ҳақида

Таниқли актриса Дилноза Кубаева номидан Instagram ижтимоий тармоғида бир неча саҳифа юритилади, уларни минглаб фойдаланувчилар кузатиб боради. Масалан, @dilnoza.kubayeva аккаунтини 3 мингга яқин фойдаланувчи, @kubayevadilnoza саҳифасини 3,5 мингдан зиёд мухлис кузатиб боради.

Журналист Феруз Муҳаммад Instagram’даги Дилноза Кубаева номидан юритилаётган аккаунтлардан қай бири айнан актрисага тегишли эканини билиш мақсадида у билан суҳбат уюштириб, нима учун кинода камнамо бўлиб қолгани ва ўзини журналистлардан олиб қочиши сабаблари ҳақидаги саволларга ҳам жавоб олди.

— Билишимча, Instagram’да умуман йўқсиз, аммо у ерда жуда кўп «Дилноза Кубаева»лар пайдо бўлган. Улар номингиздан гапириб, суратларингизни қўйиб боради. Бунга қандай муносабатдасиз?— Ҳақиқатан ҳам Instagram’да йўқман. Сиз айтган саҳифалар юзасидан яқинларим, ҳамкасбларим ҳам телефон қилиб, «Instagram’даги ростдан сенмисан?», — деб сўраганди. Мен эмаслигимни айтганимдан сўнг, бу саҳифалар менинг номимдан ҳар хил гапларни гапираётганини билдиришганида, жуда хафа бўлганман. Барча азиз мухлисларимдан у сохта аккаунтларга ишонмасликларини сўраб қоламан.

— Ўзи қайси ижтимоий тармоқдан мунтазам фойдаланасиз?— Мен умуман ҳеч қайси ижтимоий тармоқдан фойдаланмайман, бундан вақтимни қизғанаман. Ўзини кўз-кўз қилишлар, ёзилган изоҳ ва фикрлардаги хатоликлар, бемаъни видеолар... Ўзбек ёшларига бундай нарсалар умуман ярашмайди. Вақтни арзирли ишлар учун сарфлаш керак, деб ўйлайман. Бу қулайликдан фойдали мақсадлар йўлида ҳам фойдаланса бўлади.

— Бугунги кунда фильмларда деярли кўринмай қолганингиз гонорарингиз қиммат эканлигиданми?— Умуман ундай эмас. Яхши сценарийлар йўқлиги сабаб таклифларни рад этяпман.

— Ижодкорлар орасида «кучли актёр, актриса сценарий ёмон бўлса ҳам, ролини барибир яхши ўйнай олади», деган фикрлар юради.— Бўлмаган гап. Агар қоғозда бирор юк бўлмаса, минг чиранган билан ҳеч нарса чиқариб бўлмайди. Донолар: «Сценарий, сценарий ва яна бир бор сценарий!», деб кетгани бор гап-ку. Фильмда ўзак, асос, материал бўлмаса, қанча импровизация қилиб, юкни ўз гарданингга олганинг билан, фильм бўм-бўш бўлиб қолади. Ҳали ҳануз яхши сценарийни кутяпман. Алоҳида таъкидлашни истардим — яхши сценарий бўлса, фильмнинг маблағи мен учун аҳамиятли эмас.

— Нега доим журналистлардан қочиб юрасиз?— Бунинг сабаблари кўп, журналистлар томонидан бир неча бор алданганман. Газетага чиқариш мумкин бўлмаган гапларни ҳам чиқаришади. Бир хил саволлар қайта-қайта берилаверади. Улар мен ҳақимда бўлаётган гап-сўзларни миш-миш, уйдирма эканлигини билиб туриб, яна шу мавзуларни кўтаришади. «Бу аёл экан, унда ҳам кўнгил бор, у ҳақида ноўрин сўз бўлса, оила аъзоларига ҳам оғир ботади», деб ўйламайдиган журналислар ҳам бор. Бўлар-бўлмас, хунук миш-мишни сўраш, уни кўпчиликнинг эътиборига ҳавола қилиш менталитетимизга ҳам тўғри келмайди-ку, ахир. Мен ҳурмат қиладиган журналистлар ҳам кўп, аммо ўз ҳурматини билмайдиганлари ҳам етарли. Шу сабаб улардан қочиб юришга мажбурман.