Режиссёр Рустам Саъдиевнинг «Сотқин» ва «Барон» фильмларидаги иштирокидан сўнг ўзбек киноихлосмандлари учун қайтадан кашф этилган актёр Жавоҳир Зокиров «Даракчи» нашри томонидан ташкил этилган «Юлдуз-онлайн» лойиҳасида қатнашиб, мухлислар томонидан йўлланган саволларга жавоб қайтарди.
«Даракчи.uz»нинг ёзишича, бир қатор саволлар актёрнинг ўзбекистонлик режиссёрлар ва уларнинг фильмларига нисбатан муносабати ҳақида бўлган.
«Ёлқин Тўйчиев, Аюб Шаҳобиддинов, Зулфиқор Мусоқовнинг фильмларида ҳеч қачон рол ижро этмаган бўлардим. Агар жуда катта гонорар тўлашса, ўйлаб кўришим мумкин. Ҳилол Насимовнинг эса бирорта фильми ёқмайди», — деди Жавоҳир Зокиров.
Жавоҳир Зокиров нима учун фақат Рустам Саъдиевнинг фильмларида суратга тушаётгани ҳақида саволга ҳам жавоб қайтарди.
«Биринчидан, кўп режиссёрларнинг ишидан қониқмайман — Рустам аканинг ишидан қониқмаган вақтларим бўлган. Иккинчидан, мен Рустам Саъдиевнинг фильмларидан ташқари хорижий режиссёрлар билан ҳам кўп бора ишлаганман», — деди Жавоҳир Зокиров.
«Бир маълумотни айтиб ўтмоқчи эдим: ‘Сотқин’да рол ижро этиш таклифи ўзимдан чиққан. Тез кунларда Санжар Шодиевнинг ‘Сени ўзим бой қиламан’ комедик драма жанридаги фильми экранларга чиқади. Бу фильмда ҳам рол ижро этдим», — дея қўшимча қилди актёр.
Изоҳ (0)