«Барселона» жамоаси мухлислари ҳимоячи Хавьер Маскеранони қўллаб-қувватлаш мақсадида ўзига хос ташаббус билан чиқди. Аргентиналик футболчи Примеранинг 24-тури доирасида «Сельта»га қарши ўтказилган учрашувдан сўнг жамоа таркибида майдонга чиққан ўйинлари сони бўйича (264) Рональд Куман билан тенглашди. Аммо Кумандан фарқли равишда, Маскерано шу пайтга қадар бирор марта рақиб дарвозасини ишғол қила олмаган. Бу ҳақда «Чемпионат» хабар бермоқда.
Шу туфайли жамоа мухлислари ҳимоячининг ўйинга қўшаётган ҳиссасини инобатга олган ҳолда, «Change.org» сайтида «Барселона» ҳужумчисига Лионель Мессига қаратилган петиция ташкил қилди. Мурожаатда айтилишича, ҳужумчи ўз жамоадоши ва ватандошига гол уришда ёрдам бериши адолатдан бўлади.
«Месси, Маскерано пенальтини ижро этишига имкон бер, у ‘Барселона’ учун гол урсин. Бизнинг фикримизча, у ‘Барселона’ юлдузи сифатида етарли даражада эътироф этилмайди. У жамоа учун шу қадар кўп иш қилдики, ҳалигача тегишли эътирофга сазовор бўлмаганини адолатсизлик ҳисоблаймиз. Бунинг энг оддий усули – унга пенальти тепиш имкониятини бериш ва биз Мессидан шу ишни қилишни сўраймиз», – дейилади мурожаат матнида.
Маскерано ҳозирга қадар «Барселона» таркибида 4 марта ўз дарвозасини ишғол қилган.
Изоҳ (0)