Ёқутистон (Россия) пойтахти Якутск фуқаролари 50 даража совуқда қирғизистонлик тадбиркор ва унинг катта юк машинаси тўла хурмоларини сақлаб қолди. Бу ҳақда «ТАСС» хабар бермоқда.
Қирғизистонликнинг машинаси йўлда бузилиб қолади, шаҳардаги улгуржи тармоқлар эса музлаётган маҳсулотни қабул қилишдан бош тортади. Шунда якутскликлар WhatsApp орқали совуқда қолиб кетган кишига кўмак беришга чақирилган хабарларни тарқата бошлади.
«Меҳнат’ кўчасида хурмонинг беш хил нави сотилаётган фура турибди, тўғри, музлаган, лекин жуда ширин, килограмми 100 рублдан. Сотувчи четдан келган, йўлда машинаси бузилган, улгуржи тармоқлар эса олишдан бош тортган. Унга одамнинг раҳми келади — машинасида яшаяпти, бир амаллаб исиняпти, уйига кетолмайди. Келинглар, шу кишига маҳсулотини сотишга ёрдам берайлик», — дейилган мазкур хабарда.
50 даража совуқда Якутск фуқаролари шаҳар чеккасида жойлашган «Меҳнат» кўчасига келиб, тезда барча хурмоларни сотиб олди.
«Ёқутистонликлардан жуда миннатдорман. Хурмоларни ташлаб юборишга тўғри келса керак, деб ўйлагандим, бироқ машинам бузилганидан икки соат ўтиб, одамлар келиб, хурмо сотиб ола бошлади, ҳатто навбат ҳам пайдо бўлди. Уч кун ичида ҳамма маҳсулотимни сотиб бўлдим», — дея ҳикоя қилади қирғизистонлик.
Изоҳ (0)