Ўзбекистонда 1 февралдан ёшлар ўртасида фото, видео, аудио ва матн кўринишидаги ижод намуналарини ишлаб чиқишга қаратилган «E-yoshlar» республика интернет танлови бошланди. Бу ҳақда танлов сайтида хабар берилган.
Хабар беришларича, танлов Миллий ғоя ва мафкура илмий-амалий маркази, Ахборот технологиялари ва коммуникацияларини ривожлантириш вазирлиги, Олий ва ўрта махсус таълим вазирлиги, Республика Маънавият тарғибот маркази, «Маҳалла» хайрия жамоат фонди ҳамда «Камолот» ёшлар ижтимоий ҳаракати томонидан ташкил этилган.
Танловда барча қизиқувчилар иштирок этиш ва овоз бериш ҳуқуқига эга. Танлов уч тоифа — 5-15 ёшлилар, 15-25 ёшлилар ва 25-30 ёшлилар ўртасида бўлиб ўтади. Унда иштирокчилар матн (шеър, мақола, ҳикоя, сценарий) ёки аудио-видео (қўшиқ, қисқаметражли фильм, ролик, мультфильм) маҳсулотлари, илмий тадқиқот натижалари ва бошқа ижод намуналари билан иштирок этиши мумкин.
Қабул қилинган ижод намуналари фойдаланувчилар томонидан 2016 йил 1 апрелдан 30 апрелгача баҳоланади ва ғолиблар аниқланади.
Ҳар бир номинация бўйича совринли ўринларни эгаллаган ғолиблар диплом, пул маблағлари ва қимматбаҳо совғалар билан тақдирланади. Танлов ҳақида барча маълумотларни www.e-yoshlar.uz сайтидан олиш мумкин.
Изоҳ (0)