Савол-жавоб: «53-хатолик» нима ва у iPhone 6 ни «ўлдирадими»?

1. Нима бўлди?
2. Нима сабабдан бундай хатолик юз беради?
3. Apple шу йўл билан зиқна мижозларини жазолаяптими?
4. Бу муаммо фақат iPhone 6 га тааллуқлими?
5. Агар телефонга ҳеч нарса қилмаса, хавотирланмаса ҳам бўладими?
6. Хатоликни тўғрилаб бўлмаса, унда нима қилишим керак?

1. Нима бўлди?

Apple компанияси iPhone 6 смартфонини ишламайдиган қилиб қўядиган «53-хатолик»нинг мавжудлигини The Guardian нашрига тасдиқлади. Шундай хатолик юз берган тақдирда, фойдаланувчининг қўлидаги мобил телефон «ғишт»га айланади, деб ёзади Meduza. Смартфон эгаси қурилмадаги ҳеч бир ахборот — фотосуратлар, видеороликлар, ҳужжатлардан фойдалана олмайди. Бундай iPhone’ни созлаб бўлмайди, фақат янгисини сотиб олиш мумкин.

2. Нима сабабдан бундай хатолик юз беради?

Муаммо Ҳоме тугмасида жойлашган TouchID сенсори — бармоқ изи сканери билан боғлиқлиги маълум. Агар телефон эгаси синган экранни норасмий устахонада алмаштирса ёки айнан сенсорли тугмани бошқасига ўзгартирса, iOS мобил операцион тизимининг кейинги янгиланиши (update) вақтида қурилма «53-хатолик»ни чиқаради. Агар экран Apple’нинг рухсатномасига эга устахонада алмаштирилса, iOS янгиланганидан кейин ҳам муаммо юз бермайди, лекин хизмат ҳақи сезиларли қимматга тушади.

3. Apple шу йўл билан зиқна мижозларини жазолаяптими?

Кўпчилик шундай деб ўйлайди. Компания вакилларининг тушунтиришича, бу хатолик қурилма хавфсизлигини таъминлаш истаги билан боғлиқ. iPhone 6 смартфонларида ҳар бир TouchID сенсори ҳақидаги маълумот бармоқ изи ҳақидаги аниқ бир ахборот омбори билан боғланган. Операцион тизим янгиланган (update қилинган) вақтда мазкур жуфтлик ўзаро мутаносиблик учун текширилади. Агар TouchID сенсори алмаштирилган бўлса, носозлик юз беради ва телефон тўлиқ блокланиб қолади. Расмий сервис-марказлар эса TouchID’ни алмаштириш вақтида сенсорни бармоқ изи ҳақидаги ахборот омбори билан қайтадан боғлайди, шу сабабли операцион тизимнинг кейинги янгиланиши соз ўтади.

4. Бу муаммо фақат iPhone 6 га тааллуқлими?

Йўқ. iPhone 6 Plus ва нисбатан янги, замонавий iPhone 6s ва iPhone 6s Plus эгалари ҳам «53-хатолик»дан шикоят қилиши мумкин.

5. Агар телефонга ҳеч нарса қилмаса, хавотирланмаса ҳам бўладими?

Афсуски, бундай эмас. «53-хатолик» ҳақида биринчилардан бўлиб маълум қилганлардан бири (2015 йил, апрель) телефони экранини синдириб олмаганди, Ҳоме тугмасини ҳам алмаштирмаганди — унинг айфонини таъмирлашга зарурат бўлмаган. Шунга қарамай, операцион тизимнинг навбатдаги янгиланишидан сўнг унинг «ақлли телефони» оддий «ғишт»га айланган-қолган. Apple бу фойдаланувчининг қурилмасига нима бўлганини тушунтириб ўтирмаган.

6. Агар хатоликни тўғрилаб бўлмаса, унда нима қилишим керак?

iOS янгиланиши арафасида фотосуратлар, ҳужжатлар ва бошқа муҳим файлларни архив нусхаларини тайёрлаб қўйинг. Агар смартфон экранини норасмий сервис-марказда таъмирлатган бўлсангиз, операцион тизимни янгиламанг. «53-хатолик» юз берган тақдирда Apple’нинг қўллаб-қувватлаш хизматига мурожаат қилинг.