Facebook асосчиси Марк Цукерберг дунёдаги энг бадавлат одамлар рўйхатида тўртинчи ўринни эгаллади. Бу ҳақда Bloomberg’нинг ҳар куни чоп этиладиган рейтингида келтирилган маълумотларга таяниб, «РБК» хабар қилмоқда.
Маълум қилинишича, 31 ёшли тадбиркорнинг молиявий аҳволи 2 февраль куни Нью-Йорк биржасида ўтказилган савдолар якунига келиб 50 миллиард долларга яқинлашди. Шундай қилиб, Facebook асосчиси бадавлат одамлар рейтингида тегишлича, бешинчи ва олтинчи ўринларга тушиб кетган Amazon.com раҳбари Жефф Безос (49,1 миллиард доллар) ва Movil SAB бошлиғи Карлос Слим (49 миллиард доллар)лардан ўтиб кетиб, тўртинчи ўринни эгаллади.
Энг бадавлат бешлик рўйхатида Цукерберг йил бошидан буён молиявий аҳволи камаймасдан, аксинча, кўпайган ягона миллиардер бўлди. Рўйхатда биринчи ўринда турган Microsoft етакчиси Билл Гейтс шу вақт давомида 5,1 миллиард доллар, Inditex асосчиси Амансио Ортега 3,6 миллиард доллар, инвестор Уоррен Баффет 2,7 миллиард доллар, Жефф Безос эса 10,6 миллиард доллар йўқотди.
Таъкидланишича, Bloomberg рўйхатидаги миллиардерлар 2 февраль кунининг ўзида 36,2 миллиард доллар йўқотди.
Эслатиб ўтамиз, Марк Цукерберг WhatsApp мессенжеридан дунё бўйича фойдаланувчилар сони бир миллиарддан ошганлигини маълум қилган эди.
Изоҳ (0)