Фотогалерея: Дубайда қуриладиган сузувчи виллалар

Дубай — ўзининг инновацион ёндашувлари ва илғор ғоялари билан ақлни шоширувчи ростмана оламшумул лойиҳалар туғиладиган макон. Қурилиши кутилаётган мана шундай ғаройиб лойиҳалардан бири — ярми сув остида бўлган сузиб юрувчи виллалардир, деб ёзади AdMe.

Эртакнамо турар-жой мажмуаси сузиб юрувчи 42 сувости вилласидан иборат бўлади.

Лойиҳа бундай: ҳар бир вилла уч қаватдан иборат бўлиб, юқори икки қават сув устида, биринчиси эса (аслида нолинчиси) сув остида бўлади.

Юқори қават — ҳордиқ жойи: бу ерда очиқ душхона, мини-бар, кичик ошхона ва шаффоф шишадан тайёрланган жакузи-ванна бор.

Денгиз билан бир сатҳда жойлашган марказий қават — яшаш жойи, бу ерда меҳмон кутиш ҳам мумкин.

Ётоқхона ва ваннахона сув остида — нолинчи қаватда жойлашган.

«Сувости»даги хона деворлари ўрнида панорамали ойналар бўлади, шу сабабли вилла эгалари ўзига хос шахсий океанариум эгасига айланади, дейиш мумкин.

Сузиб юрувчи виллаларнинг дастлабкиси 2016 йил охирида фойдаланишга топширилиши кутилмоқда.