Россия мудофаа вазирлиги Туркия ташқи ишлар вазирлигининг 30 январь, шанба куни эълон қилинган Су-34 самолёти мамлакат ҳаво кенгликларини бузганлиги ҳақидаги баёнотини сафсата деб атади. Бу ҳақда «РБК» хабар бермоқда.
«Россия ҳарбий самолётлари Туркия ҳаво чегарасини бузмаган. Бу ҳақдаги баёнотлар эса қуруқ сафсата. Ҳаво кенгликларини назорат этувчи радарлар объектнинг баландлиги, йўналиши ва тезлигини қайд этади, холос, қайси мамлакатга тегишли эканлигини аниқлай олмайди. Буни фақат бошқа бир самолёт ёрдамидагина амалга ошириш мумкин, бундай ҳолат эса юз бермаган», — дея таъкидлаган вазирлик расмий вакили Игорь Конашенков.
Туркия ташқи ишлар вазирлиги баёнотида 29 январь куни эрталаб Россия ҳарбий-ҳаво кучларининг Су-34 самолёти мамлакат ҳаво ҳудудига бостириб киргани, самолёт экипажи чегарага яқинлашаётгани ҳақида рус ва инглиз тилларида кўп бор огоҳлантирилгани маълум қилинган. Туркия президенти Ражаб Тоййиб Эрдўғон мазкур ҳодиса сабаб Владимир Путин билан учрашмоқчи эканлигини билдирган.
Изоҳ (0)