Буюк британиялик астронавт Тимоти Пик айни пайтда Халқаро космик станцияда (ХКС) бўлган ўсимликлар уруғини ўстиришда кўмак сўраб, мамлакатдаги мактаб ўқувчиларига видеомурожаат йўллади. Мазкур акция Қироллик боғдорчилик жамияти ва Буюк Британия коинот агентлигининг ҳамкорликдаги илмий лойиҳаси доирасида амалга оширилиши кўзда тутилган, дея хабар беради «ТАСС».
Пик Ерга қайтгандан сўнг Буюк Британиянинг барча минтақаларидаги ўқувчиларга ХКСда етиштирилган уруғлар тарқатилиши мўлжалланган. Ўқувчилар оддий тажриба ўтказиши, яъни уларни ўстириб, уруғи коинотда бўлиб қайтган ўсимликлар ривожланишида фарқли жиҳатлар бор ёки йўқлигига аниқлик киритиши лозим.
«Парвоз якунлангандан сўнг ХКСдаги уруғларни ўзим билан бирга олиб келаман. Улар илмий тажриба доирасида минглаб мактабларга юборилади ва коинотда бўлмаган уруғлар билан бирга ўстириб кўрилади», — дея таъкидлаган астронавт.
Пикнинг видеомурожаати Буюк Британиядаги 17 мингта ўқув муассассига тарқатилди. Тажриба натижалари шу йил эълон қилиниши мўлжалланган.
Изоҳ (0)