Туркия президенти Ражаб Тоййиб Эрдўғон Россиянинг Су-34 самолёти Туркия ҳаво ҳудудига бостириб киргани туфайли Владимир Путин билан учрашмоқчи, дея хабар бермоқда «РБК».
«Мен бизнинг ташқи ишлар вазиримиздан жаноб Путин билан шахсан учрашиш истагимни етказиб қўйишни сўрадим, — деди Эрдўғон. — Бироқ ҳали жавоб олганимча йўқ».
Ушбу мавзу бўйича НАТО бош котиби Йенс Столтенберг ҳам баёнот берди. У Россияни Шимолий Атлантика альянсига аъзо мамлакат ҳаво ҳудуди бузилишига йўл қўймаслик учун «барча зарур чораларни кўришга» чақирди.
Нашр эслатишича, 30 январь, шанба куни Туркия ташқи ишлар вазирлиги баёнот эълон қилди, унда айтилишича, 29 январь куни эрталаб Россия ҳарбий-ҳаво кучларининг Су-34 самолёти мамлакат ҳаво ҳудудига бостириб кирган. Анқарадагилар таъкидлашича, самолёт экипажи чегарага яқинлашаётгани ҳақида рус ва инглиз тилларида кўп бора огоҳлантирилган.
Туркия ТИВ ҳодисани Россиянинг икки мамлакат ўртасидаги кескинликни кучайтиришга қаратилган интилиши деб атади. Анқара «бундай хатти-ҳаракатлар жиддий оқибатларни келтириб чиқариши, улар учун Россия Федерацияси жавобгар бўлиши» ҳақида огоҳлантирди.
Изоҳ (0)