Тошкентда 28 январь куни ёмғир қорга айланиши мумкин

28 январь, жума куни Ўзбекистонда ёғингарчилик кузатилади. Бу ҳақда «Ўзгидромет» маркази ахборот берди.

28 январга ўтар кечаси Устюртда -13 даражагача, Қорақалпоғистон Республикаси, Хоразм вилоятида, шунингдек, Навоий вилоятининг шимолида -10 даражагача, тоғли ҳудудларда -5 даражагача совуқ бўлади.

Бундан ташқари, 28 январга ўтар кечаси Фарғона водийси вилоятларида 0...+5 даража, Тошкент шаҳрида, Қашқадарё ва Сурхондарё вилоятларида +7 даражагача, Навоий, Бухоро, Тошкент, Самарқанд, Жиззах, Сирдарё вилоятларида +8 даражагача илиқ бўлади.

28 январь куни кундузи Қорқалпоғистон Республикаси, Хоразм вилоятида, Навоий вилоятининг тоғли ҳудудларида -5...0 даража совуқ бўлади. Ўзбекистоннинг қолган ҳудудларида ҳаво ҳарорати +2...+10 даража илиқ оралиғида бўлиши кутилмоқда.

Мамлакатнинг барча ҳудудларида ёғингарчилик кутилади. Қорақалпоғистон ва Хоразмнинг айрим жойларида қор ёғиши мумкин, Фарғона водийсида ёмғир ёғади, Тошкент шаҳрида эса ёмғир кечга томон қорга айланиши мумкин. Қолган ҳудудларда вақти-вақти билан ёмғир, қор ёғиши кутилади.