«Ростини айтсам, аввалига милиционер бўлмоқчи эдим, лекин энди қатъий қарор қабул қилдим — шифокор бўламан». Жонибек Чориев 11 ёшда ва шифокор бўлиш қарорини юрагида ўтказилган операциядан сўнг қабул қилди. Унинг оиласи бу операцияни ўн йил давомида кутди. Жонибек ўзининг касаллик тарихини — Сурхондарёда тиббий кўрикдан ўтганида унга юрак қоринчалари пардаси нуқсони (ЮҚПН) ташхиси қўйилгани, тез-тез шамоллаши, нимжонлиги ва очиқ юракда операция ўтказиш учун керак бўлган махсус мослама тўғрисида, ҳамма-ҳаммаси ҳақида батафсил сўзлаб берди.
Жонибекнинг оиласи тўрт кишидан иборат — у, онаси ва икки опаси. Отаси уч йил олдин Россияга кетган, шундан бери ундан ҳеч қандай хат-хабар йўқ. Онаси, Зуҳра — уй бекаси, тасодифий даромаддан кун кўради. Юрак хасталиги бор болалар учун давлат нафақа тайинлаган, лекин прописка билан боғлиқ муаммолар сабаб, нафақани расмийлаштиришнинг ҳозирча иложи йўқ. Жонибек тилга олган махсус мослама — оксигенатор унинг оиласи учун жуда қимматлик қилади.
Оксигенаторлар давлат томонидан сотиб олинади, лекин юраги операцияга муҳтож болаларнинг ҳаммасига ҳам мазкур мосламаларни етказиб бўлмайди. Ҳар минг нафар чақалоқнинг 6—8 нафарида туғма юрак хасталиклари учрайди, бу барча туғма хасталикларнинг 30 фоизини ташкил этади. Юрак хасталиклари янги туғилган ва бир ёшгача бўлган болаларнинг ўлимлари сабаблари орасида биринчи ўринда туради. Бир ёшга тўлгандан сўнг, болалар ўлими эҳтимоли кескин камаяди ва 1 ёшдан 15 ёшгача бўлганлар орасида хасталиклардан нобуд бўлган болалар сони 5 фоиздан ошмайди. Ушбу ҳолат катта ва жиддий муаммо эканлиги кундек равшан.
Болалар кардиожарроҳлик маркази мудири Дониёр Пирназаровнинг сўзларига кўра, яқин қариндошлар орасидаги никоҳ, турли патоген факторлар таъсири (юқумли касалликлар, витамин етишмаслиги, назоратсиз ва бетартиб дори истеъмол қилиш, токсикоз), тамаки чекиш ва алкогол ичимликларни истеъмол қилиш сабабли ҳомила ривожланишининг бузилиши — туғма юрак хасталикларининг асосий омиллари ҳисобланади.
Туғма юрак хасталикларини фақат жарроҳлик йўли билан даволаш мумкин. Кардиожарроҳлик ютуқлари шарофати билан оғир хасталикларни ҳам мураккаб операциялар йўли билан даволаш имкони пайдо бўлди. Хусусан, болалар кардиожарроҳлик маркази шифокорлари ҳар ойда 60 та операция ўтказади.
Операцияга керакли дори-дармон, материаллар, жумладан, оксигенатор харажатларини ҳам кўтарадиган компания борлиги Чориевлар оиласи учун янги йил туҳфаси бўлди. «Ура, мен операцияга бораман!», — дея хурсандчилигини яшира олмади Жонибек. Тошкентга етиб келишганидан сўнг, керакли пул маблағлари «Биргаликда ҳаётларни қутқарамиз!» акцияси доирасида тўпланганини уларга айтиб беришди. 2015 йил ноябри давомида «Сочная Долина» шарбатининг сотилган ҳар бир қутисидан тушган пулнинг муайян бир қисми Тошкент педиатрия институтининг клиникаси томонидан очилган махсус ҳисоб-рақамига ўтказилди.
Жонибек билан операциядан кейин учрашдик ва унинг қилган биринчи иши менга ташаккур изҳор этиш бўлди. Ҳайрон бўлганимни кўриб, тушунтирди: «Пулни мени танимаган одамлар тўплаган экан, сиз ҳам улар орасида бўлишингиз мумкин».
Хайрлашув пайтида Жонибек келажакда шифокор бўлиб, «одамларнинг яхшилигига яхшилик билан жавоб қайтариш учун», Сурхондарё болаларини операция қилиб, даволашини айтди.
Бу «Сочная Долина» савдо маркаси томонидан ташкил этилган «Биргаликда ҳаётларни қутқарамиз!» акцияси доирасидаги ўн бешта «юрак ҳикоялари»нинг учинчиси ва бу ҳикояларнинг давоми бор.
Реклама ҳуқуқи асосида. Маҳсулот сертификатланган
Изоҳ (0)