Канаданинг Саскачеван вилояти, Ла-Лош шаҳрида мактаб ўқувчиси уйида икки нафар акасини отиб ўлдирди, сўнг мактабга йўл олди ва бу ерда яна икки киши унинг қурбони бўлган. Бу ҳақда шаҳар мэри вазифасини бажарувчи Кевин Жанвье маълум қилди, дея хабар беради «ТАСС».
Мактабда ҳалок бўлганлардан бири ўқитувчи бўлиб ишлаган мэр вазифасини бажарувчининг ягона қизи, 23 ёшли Мари Жанвье бўлиб, тўртинчи қурбоннинг шахси ҳақида маълумот берилмаган. The National Post нашри икки нафар жабрдийда оғир ҳолатда касалхонада эканлигини билдирмоқда.
Отишма уюштирган ўқувчи мактабдан ташқарида қўлга олинди. Унинг шахси, бундай жиноятга қўл уришига сабаб бўлган омиллар ҳозирча ошкор этилмаган.
Охирги бор Канада мактабларида отишма 1999 йилда рўй берганди: ўшанда Альберта вилояти, Табер шаҳрида 14 ёшли ўқувчи мактабдошларидан бирини отиб ўлдирган, иккинчисини оғир яралаганди.
Изоҳ (0)