Калифорния технология институти олимлари Майкл Браун ва Константин Батигин «Х сайёра» борлиги ҳақидаги янги далилларни келтирди, деб хабар қилади Meduza.
Тадқиқотчилар Astronomical Journal журналида сайёра чиндан ҳам мавжудлигини исботловчи билвосита далилларни чоп қилди.
Браун ва Батигин Нептуннинг ортида жойлашган бошқа объектларнинг орбитасини ўрганиб чиқди. Тадқиқот давомида улар қандайдир осмон жисми бу объектларга кучли гравитацион таъсир кўрсатаётганини аниқлади.
Агар «Х сайёра» чиндан ҳам мавжуд бўлса, унинг массаси Ерникидан ўн марта катта. Осмон жисмининг Қуёш атрофида айланиш даври 15 минг йилни ташкил этади.
Илмий иш муаллифлари сайёрани телескоплар ёрдамида аниқлаш учун беш йил кетиши мумкинлигини таъкидламоқда. Улар «сайёра телескоп орқали аниқланмагунча, унинг мавжудлиги фақат фараз бўлиб қолиши»ни тан олмоқда.
Маълумот учун, ҳозирга қадар олимлар томонидан аниқланган Қуёш тизимидаги сайёралар қаторига Меркурий, Венера, Ер, Марс, Юпитер, Сатурн, Уран ва Нептун киради.
Изоҳ (0)