Аввалроқ Россиянинг «Вулкан» онлайн-казиноси, ҳозирда эса «‘Миллион’ ўйин клуби» брендига эгалик қилувчи Россиянинг Crestoria Holdings компанияси маҳсулот белгиларига бўлган алоҳида ҳуқуқларини бузгани учун Apple’дан 1 миллион рубль талаб қилмоқда. Бу ҳақда Meduza хабар беради.
Crestoria Holdings Apple’нинг Россиядаги ваколатхонаси «Эппл Рус» МЧЖга нисбатан даъвосини Москва ҳакамлар судига топширди.
Шикоятчи, шунингдек, Apple’дан «AppStore’дан Apple қурилмаларига ўрнатиб бўлинган дастурларда маҳсулот белгисининг қонуний эгаси кимлигини кўрсатган ҳолда, йўл қўйилган қонунбузарлик ҳақида ихтиёрий эътирофни эълон қилиш»ни ҳам талаб этмоқда.
Бунда гап айнан қандай маҳсулот белгилари ҳақида бораётганига суд ҳужжатларида аниқлик киритилмаган. Finstar инвестиция гуруҳи вакили сўзларига кўра, даъво «‘Победа’ давлат лотереялари» компанияси ишлатадиган «Победа» маҳсулот белгисига алоқадор.
Apple’дагилар даъво юзасидан изоҳ бермади.
Изоҳ (0)