Зинедин Зидан: Роналду сотилмайди, у «Реал»нинг юраги, қалби ҳисобланади

«Реал» (Мадрид) бош мураббийи Зинедин Зидан жамоадаги муҳит ҳақида гапириб берди, шунингдек, ҳужумчи Криштиану Роналду клубни тарк этмаслигини маълум қилди. Бу ҳақда «Sports.ru» хабар бермоқда.

Криштиану Роналду

У сотилмайди, чунки жамоамизнинг юраги, қалби ҳисобланади. Мен шу ерда эканман, у ҳеч қаёққа кетмайди.

Жамоа ҳақида

Жамоа бир мақсад йўлида тўла жамланган ва яхши фаолият олиб бормоқда. Ҳозиргача ўтказилган уч машғулот мен учун, айниқса улар учун яхши бўлди. Таркиб борасида ҳеч нарса айтмайман. Ҳужумкор учлик аниқ майдонга тушади, қолганини кейин кўрамиз.

Иско ва Хамес

Улар жуда яхши ва муҳим ўйинчилар. Вазифам — уларни рағбатлантириш, қўллаб-қувватлаш. Албатта, кимдир бошқаларга нисбатан кўпроқ ўйнайди, аммо жамоа — энг муҳими.

Доменек 

Унинг ўз фикри бор ва бу ғайриоддий ҳолат эмас. У ҳақда қандай фикрда эканлигимни яхши билади, шу сабабли Доменек ҳақида бошқа айтадиган гапим йўқ.

Январь ойидаги трансферлар

Кимдир кетишини истамайман ва умид қиламанки, ҳеч ким кетмайди. Ундан ташқари, янги футболчилар сотиб олишни ҳам режалаштирмаганман. Яхши жамоам бор, улар билан ишлашда давом этаман.

Ҳужумкор учликнинг ҳимояланиши

Тўп бизда бўлмаганида барча биргаликда ҳаракат қилади. Икки-уч футболчи ҳимояда иштирок этмаслигига йўл қўйиб бўлмайди.