Болалар спортини ривожлантириш жамғармаси маблағлари ҳисобидан 2015 йилда 479 ўқувчи халқаро мусобақаларда иштирок этди

2015 йилда Халқ таълими вазирлиги ҳузуридаги Болалар спортини ривожлантириш жамғармаси маблағлари ҳисобидан Хитой, Италия, Франция, Португалия, Болгария, Япония, Греция, Чехия, Россия каби 24 та давлатда бўлиб ўтган 53 та нуфузли халқаро спорт мусобақаларида 479 нафар иқтидорли ёшларнинг иштироки таъминланди. Бу ҳақда Болалар спортини ривожлантириш жамғармаси спорт ишлари бўйича бўлим бошлиғи Баҳодир Маматназаров «Дарё»га хабар берди.

Спортнинг 27 туридан қатнашган ўқувчилар умумий ҳисобда 314 та, шундан 140 та олтин, 83 та кумуш, 91 та бронза медалларини қўлга киритди. 2014 йилга нисбатан олтин медаллар сони 14 тага кўпайган.

Маълумот учун, Болалар спортини ривожлантириш жамғармаси Ўзбекистон Республикаси Президенти ташаббуси билан 2002 йил 24 октябрда ташкил этилган. Бугунги кунга қадар жамғарма маблағлари ҳисобидан 1922 та спорт иншооти барпо этилган, 5369 нафар иқтидорли ўқувчиларнинг халқаро танловлардаги иштироки таъминланган.