Тошкентда wеек-end: «Ўлимдан қайтган» Ди Каприо, «Қор маликаси» Саида, халқаро гроссмейстерларни йиғадиган «Пойтахт»

«Дарё» яқинлашиб келаётган дам олиш кунлари — 9—10 январда Тошкентда бўладиган қизиқарли тадбирлар рўйхатини эътиборингизга ҳавола қилади.

Кино

Тошкент кинотеатрларида Леонардо Ди Каприо иштирокидаги «Ўлимдан қайтган» («The Revenant») фильми премьераси бўлиб ўтади. Шунингдек, «Юлдузлар жанги» сагаси еттинчи эпизоди, Иван Царевич ва Снупи ҳақидаги мультфильмлар, «Дадам билмасин», «Пайшанбадан пайшанбагача-2» каби миллий комедиялар намойишлари ҳам давом этмоқда. Фильм намойишларининг тўлиқ жадвали билан «Дарё.Афиша»да танишиш мумкин.

Театрлар

Мактаб ўқувчилари учун қишки таътилнинг сўнгги кунларида болалар билан бирга Ўзбек миллий академик драма театрида «Ўрмон сирлари», Муқимий театрида эса «Ялмоғизнинг найранги» спектаклларини томоша қилиш мумкин. Театрлар репертуари «Дарё.Афиша»да келтирилган.

Концертлар

«Истиқлол» санъат саройида 10 январга қадар «Қор маликаси» мюзикли бўлиб ўтади, дея ахборот бермоқда Afisha. Эътиборли томони, унда бош ролларни хонандалар Саида, Сардор Милано ва Жасур Мирсагатов ижро этган.

Бошқа

«Газета.uz»нинг хабар беришича, 8—11 январь кунлари «Пойтахт» бизнес марказида халқаро гроссмейстерлар иштирокида шахмат мусобақаси бўлиб ўтади, болажонлар учун Next савдо-кўнгилочар марказида ижодий маҳорат машғулотлари, Caravan Kids’да эса пазандалик машғулотлари ташкил этилиши режалаштирилган.