Ўзбекистонлик санъаткорлар янги йилни қандай бошлади? (фото)

My Day юлдузлар янги йилнинг биринчи ҳафтасида нималар билан бандлигига аниқлик киритди.

Манзура янги йилда, «Қайнона ва келин» телесериалининг съёмка ишларида суратга тушишни давом эттирмоқда.

Янги йилнинг илк ҳафтасида Зиёда ўз вақтини оиласи ва яқинлари даврасида ўтказишга бағишлади. 7 январда эса хонанда Instagram тармоғида барча яқинлари ва дўстларидан туғилган кунига бағишланган табрикларни қабул қилди.

Райҳон ўзининг ижодий жамоаси билан февраль ойида бўлиб ўтадиган концерт дастурига аллақачон тайёргарлик ишларини бошлаб юборган. Шунингдек, хонанда тез кунда мухлислари эътиборига «Жавоб бер» таронасига ишланган видеоклипни тақдим этиш арафасида.

Сардор Мамадалиев эса «Дил яраси» таронасига клип тасвирга олиш ишлари билан банд. Мазкур клипда Юлдуз Ражабова ва Карим Мирҳодиевлар иштирок этади.

Дилсўз ҳам йилни мазмунли бошлади. У мухлисларига қишки фотосессиясини тақдим этди. Шунингдек, хонанда 8 январь куни «Айтгин» номли янги таронасинининг премьерасини ўтказиш арафасида.

Севара Назархон янги йилнинг биринчи ҳафтасида ўзи учун янги фотосессия ўтказди. Сураткашлик вазифасини эса истеъдодли Азиза Кариева амалга оширди.

Шаҳзода MY5 телеканалида «Наша радост» муаллифлик кўрсатувини олиб бормоқда. 2016 йилнинг 3 январида хонанда кўрсатувнинг навбатдаги сонида тасвирга тушиб, ўз оиласи билан қишки таътилга йўл олди. Шунингдек, тез орада Шаҳзода, хонанда Шоҳруҳ билан янги қўшиғи ва унга ишланган клипини омма ҳукмига тақдим этиш арафасида.

Шоҳруҳхон, Шуҳрат Йўлдошев билан ижро этган «Қизгина» дуэтига клип тасвирга олдирмоқда. Демак, ака-укалардан тез орада янги клипни кутиб қолинг.

Сардор Раҳимхон янги йилда «Омон-омон» номли таронасига видеоклип тасвирга олдирди. Тез орада реал воқеаларга асосланган ижод маҳсули мухлислар ҳукмига тақдим этилади.

Муниса Ризаева янги йилнинг илк ҳафтасида мухлисларга шўх қўшиғини тақдим этди. «Манбоп» таронаси 4 январь куни премьера қилинди.