Toshkentda week-end: “O‘limdan qaytgan” Di Kaprio, “Qor malikasi” Saida, xalqaro grossmeysterlarni yig‘adigan “Poytaxt”

“Daryo” yaqinlashib kelayotgan dam olish kunlari — 9—10-yanvarda Toshkentda bo‘ladigan qiziqarli tadbirlar ro‘yxatini e’tiboringizga havola qiladi.

Kino

Toshkent kinoteatrlarida Leonardo Di Kaprio ishtirokidagi “O‘limdan qaytgan” (“The Revenant”) filmi premyerasi bo‘lib o‘tadi. Shuningdek, “Yulduzlar jangi” sagasi yettinchi epizodi, Ivan Sarevich va Snupi haqidagi multfilmlar, “Dadam bilmasin”, “Payshanbadan payshanbagacha-2” kabi milliy komediyalar namoyishlari ham davom etmoqda. Film namoyishlarining to‘liq jadvali bilan “Daryo.Afisha”da tanishish mumkin.

Teatrlar

Maktab o‘quvchilari uchun qishki ta’tilning so‘nggi kunlarida bolalar bilan birga O‘zbek milliy akademik drama teatrida “O‘rmon sirlari”, Muqimiy teatrida esa “Yalmog‘izning nayrangi” spektakllarini tomosha qilish mumkin. Teatrlar repertuari “Daryo.Afisha”da keltirilgan.

Konsertlar

“Istiqlol” san’at saroyida 10-yanvarga qadar “Qor malikasi” myuzikli bo‘lib o‘tadi, deya axborot bermoqda Afisha. E’tiborli tomoni, unda bosh rollarni xonandalar Saida, Sardor Milano va Jasur Mirsagatov ijro etgan.

Boshqa

“Gazeta.uz”ning xabar berishicha, 8—11-yanvar kunlari “Poytaxt” biznes markazida xalqaro grossmeysterlar ishtirokida shaxmat musobaqasi bo‘lib o‘tadi, bolajonlar uchun Next savdo-ko‘ngilochar markazida ijodiy mahorat mashg‘ulotlari, Caravan Kids’da esa pazandalik mashg‘ulotlari tashkil etilishi rejalashtirilgan.